សៀមរាប: ថ្ងៃទី២៩ ខែកញ្ញា ឆ្នាំ២០២៦ លោក អ៉ឹង គឹមលាង អភិបាលរងខេត្ត និងជាអនុប្រធានអចិន្ត្រៃយ៍គណៈកម្មាធិការគ្រប់គ្រងគ្រោះមហន្តរាយខេត្តតំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត ដោយមានូលរួមពីមន្ទីរពាក់ព័ន្ធរួមមាន មន្ទីរធនធានទឹក និងឧតុនិយមខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរអភិវឌ្ឍន៍ជនបទខេត្ត មន្ទីរសាធារណការ និងដឹកជញ្ជូនខេត្ត មន្ទីរព័ត៌មានខេត្ត មន្ទីរសុខាភិបាលនៃរដ្ឋបាលខេត្ត មន្ទីរអប់រំ យុវជន និងកីឡាខេត្ត រដ្ឋបាលស្រុកពួក ស្រុកអង្គរជុំ ស្រុកស្រីស្នំ និងមន្ត្រីជំនាញរដ្ឋបាលខេត្តសៀមរាប បានចុះពិនិត្យស្ថានភាពផលប៉ះពាល់ដោយសារជំនន់ទឹកភ្លៀង នៅក្នុងភូមិសាស្ត្រស្រុកពួក ស្រុកអង្គរជុំ និងភូមិសាស្ត្រស្រុកស្រីស្នំ ក្នុងខេត្តសៀមរាប។
ជាមួយនឹងការចុះពិនិត្យ និងដេីម្បីឆ្លើយតបតាមតម្រូវការជាក់ស្តែង លោក អភិបាលរងខេត្តបានដាក់ចេញនូវវិធានការចាំបាច់សម្រាប់ឆ្លើយតប និងដោះស្រាយបញ្ហាចំពោះមុខ ដូចជា៖
១/បានចង្អុលបង្ហាញដាក់គ្រឿងចក្រស្តារបើកមុខទឹកដែលជន់លិច បង្កផលប៉ះពាល់ និងដើម្បីរំដោះមុខទឹករួមមាន៖
-ស្តារមុខទឹកប្រឡាយភូមិធ្វាស ឃុំត្រីញ័រ ស្រុកពួក និងរំដោះទឹកមុខសាលាបឋមសិក្សាធ្វាស
-កាយបើកមុខទឹកដាក់លូរំដោះទឹកឆ្លងផ្លូវភូមិត្រាំសសរ ឃុំត្រាំសសរ ស្រុកស្រីស្នំ
២/បានណែនាំដល់អាជ្ញាធរស្រុកអង្គរជុំ ឱ្យសម្អាតសំរាម ស្មៅ តាមបណ្តោយប្រឡាយផ្លូវបេតុងភូមិតាលាវ ឃុំតាសោម និងបិទទ្វារបញ្ចៀសទឹកទៅស្ទឹងផ្លាំង និងកុំឱ្យទឹកហូរមកជន់លិចសាលាស្រុកអង្គរជុំ និងវិទ្យាល័យអង្គរជុំ រួមនិងទីប្រជុំជនឃុំចារឈូក។ ទន្ទឹមនឹងនេះត្រូវលើកផែនការស្តារប្រឡាយ និងរំដោះទឹក កុំឱ្យជន់លិចនៅឆ្នាំបន្ទាប់។
៣/មន្ទីរជំនាញ និងអាជ្ញាធរមូលដ្ឋាន ត្រូវរួមសហការគ្នាដោះស្រាយបញ្ហាជន់លិចដំណាំស្រូវ ហេដ្ឋារចនាសម្ធ័ន្ធ ។
