ខេត្តសៀមរាប: នាព្រឹកថ្ងៃទី១៥ ខែកញ្ញា ឆ្នាំ២០២៦ លោកស្រី ម៉ននី រង្សី អភិបាលរងខេត្តសៀមរាប និងជាប្រធានក្រុមការងារកិច្ចការពារកុមារ ចូលរួមជាគណៈអធិបតីក្នុងកិច្ចប្រជុំសម្របសម្រួលកិច្ចការពារកុមារ ដេីម្បីតាមដាន គាំទ្រការអនុវត្ត CP-SOP របស់អង្គការសង្គមស៊ីវិល និងអាជ្ញាធរថ្នាក់ក្រោមជាតិនៅខេត្តសៀមរាប ដែលរៀបចំដោយអង្គការកល្យាណមិត្ត ក្រោមការឧបត្ថម្ភរបស់អង្គការ UNICEF សហការជាមួយរដ្ឋបាលខេត្តសៀមរាប នៅសាលាគរុកោសល្យ និងវិក្រឹត្យការខេត្តសៀមរាប ដែលមានការចូលរួមពី លោក អនុប្រធានមន្ទីរសង្គមកិច្ច លោក នាយកកម្មវិធីកល្យាណមិត្ត និងតំណាងអង្គការបណ្ដាញ3PC រដ្ឋបាលក្រុង ស្រុកពាក់ព័ន្ធ និងអង្គការដៃគូ ជាច្រើនរូប។
កិច្ចប្រជុំសម្របសម្រួលកិច្ចការពារកុមារ ដេីម្បីតាមដាន គាំទ្រការអនុវត្ត CP-SOP របស់អង្គការសង្គមស៊ីវិល និងអាជ្ញាធរថ្នាក់ក្រោមជាតិនៅខេត្តសៀមរាប ធ្វើឡើងក្នុងគោលបំណង ពង្រឹង និងសម្របសម្រួលប្រព័ន្ធកិច្ចការពារកុមារថ្នាក់ក្រោមជាតិ តាមរយៈសេវាកម្មផ្ទាល់ ក៏ដូចជាពង្រឹងសមត្ថភាពថ្នាក់ក្រោមជាតិ នៃប្រព័ន្ធកិច្ចការពារកុមារ ប្រេីប្រាស់ប្រព័ន្ធ និងវិធីសាស្ត្រដូចគ្នា ក្នុងការធ្វើឱ្យប្រសើរឡើងនូវបណ្ដាញ និងការសម្របសម្រួលរវាងអ្នកផ្ដល់សេវា ក៏ដូចជាការទំនាក់ទំនង និងលើកកម្ពស់ការយល់ដឹងនៅក្នុងសហគមន៍ ស្ដីពីការការពារកុមារនៅក្នុងខេត្តសៀមរាប។
បន្ទាប់ពីកិច្ចប្រជុំខាងលេីបានបញ្ចប់ លោកស្រីអភិបាលរងខេត្ត ក៏បានចុះសួរសុខទុក្ខករណីគ្រួសារកុមារក្រីក្រ និងងាយរងគ្រោះ និងបានផ្ដល់ជា អង្ករ ទឹកត្រី ត្រីខ ទឹកសុីអីវ និងប្រេងឆានៅសង្កាត់ស្លក្រាម និងសង្កាត់ជ្រាវ ក្រុងសៀមរាប ខេត្តសៀមរាប។
