ភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី១០ ខែកញ្ញា ឆ្នាំ២០២៦ បានប្រកាសសាលក្រមផ្តន្ទាទោសយុវតី២នាក់ ដាក់ពន្ធនាគារម្នាក់ៗកំណត់រយៈពេល២០ឆ្នាំ ពាក់ពន្ធសំណុំរឿង.ឃាតកម្មគិតទុកជាមុន ពោលគឺចាក់សម្លាប់ជីដូនខ្លួនឯងបង្កើត ខឹងលោកយាយស្តីបន្ទោស និងហាមឃាត់មិនឲ្យមានទំនាក់ទំនងស្នេហាក្នុងវ័យសិក្សា ។
ជនជាប់ចោទទាំង២នាក់ ម្នាក់ឈ្មោះ សេង ច័ន្ទបូណ៍មី អាយុ១៩ឆ្នាំ និងម្នាក់ឈ្មោះ សេង ហេងសានីកា អាយុ១៨ឆ្នាំ ។ សាលក្រមទុកសិទ្ធិប្តឹងឧទ្ធរណ៍តាមកំណត់ច្បាប់ បើសិនភាគីណាមួយកើតទុក្ខមិនសុខចិត្តចំពោះការកាត់ក្តីនេះ ។
សូមរំលឹកថា ៖ កាលពីថ្ងៃទី១០ មេសា ឆ្នាំ២០២៦ លោក ញ៉ាន បូរី ព្រះរាជអាជ្ញារង នៃអយ្យការអមសាលាលាដំបូងរាជធានីភ្នំពេញ បានសម្រេចចោទប្រកាន់យុវតី២នាក់ ដែលចាក់សម្លាប់ជីដូនខ្លួនឯងនៅខណ្ឌច្បារអំពៅ រាជធានីភ្នំពេញ ពីបទឃាតកម្មតគិតទុកជាមុន និងបានចាត់បញ្ជូនទៅចៅក្រមស៊ើបសួរសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
សូមរំលឹកទៀតថា នៅព្រឹកថ្ងៃទី៩ ខែមេសា ឆ្នាំ២០២៦ កម្លាំងសមត្តកិច្ចនៃអធិការដ្ឋាននគរបាលខណ្ឌច្បារអំពៅ បានធ្វើការឃាត់ខ្លួនជនសង្ស័យ២នាក់ ដែលជាចៅស្រីបង្កើតចាក់សម្លាប់ជីដូនឈ្មោះ ទី គង់ អាយុ៦៤ឆ្នាំ មុខរបរលក់ដូរ ស្នាក់នៅផ្ទះលេខ៣អA តាមបណ្តោយផ្លូវលេខ៦២០ ភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ដោយមូលហេតុខឹងព្រោះតែរឿងហាមឃាត់មិនឲ្យមានស្នេហាក្នុងវ័យកំពុងសិក្សាររៀនសូត្រ ដែលហេតុការណ៍នេះបានកើតឡើង កាលពីព្រឹកថ្ងៃទី៦ ខែមេសា ឆ្នាំ២០២៦ នៅចំណុចផ្ទះលេខ៣អA តាមបណ្តោយផ្លូវលេខ៦២០ ភូមិកណ្តាល សង្កាត់ច្បារអំពៅ២ ខណ្ឌមានជ័យ រាជធានីភ្នំពេញ ។
នៅចំពោះមុខសមត្ថកិច្ចជនសង្ស័យទាំង២នាក់ បានសារភាពប្រហាក់ប្រហែលគ្នាថា កាលពីវេលាម៉ោង១០ និង២០នាទីយប់ ថ្ងៃទី៥ ខែមេសា ឆ្នាំ២០២៦ ពួកគេបានប្រើកាំបិតចុងស្រួច ចាក់ទៅលើលោកយាយពីក្រោយខ្នងចំនួន១កាំបិត បណ្តាលឲ្យហូរ ឈាមស្លាប់មួយរំពេចតែម្តង ។ មូលហេតុ ពួកគេមានគំនុំគុំគួនជាមួយលោកយាយយូរមកហើយ ព្រោះតែខឹងជីដូនបានហាមឃាត់ពួកគេមិនឲ្យមានស្នេហាក្នុងវ័យសិក្សា ៕
