ខេត្តព្រៃវែង៖ នៅព្រឹកថ្ងៃទី២៤ ខែមិថុនា ឆ្នាំ២០២៦ នេះ លោក លាត ភិរុណ អភិបាលរងនៃគណៈអភិបាលខេត្តព្រៃវែង បានអញ្ជើញជាអធិបតីភាពតំណាងដ៏ខ្ពង់ខ្ពស់ ឯកឧត្តម សួន សុម៉ាលីន អភិបាល នៃគណៈ អភិបាលខេត្ត ក្នុងពិធីបើកវគ្គបណ្ដុះបណ្ដាលតម្រង់ទិសស្តីពី «ការងារអត្តសញ្ញាណកម្ម និងលិខិតបទដ្ឋានគតិយុត្តថ្មីៗ ព្រមទាំងការអនុវត្តន៍ការងារតាមដាន និងជំរុញការផ្ដល់ឯកសារអត្តសញ្ញាណភូមិភាគ៦»។
ពិធីនេះត្រូវបានរៀបចំឡើងនៅសាលប្រជុំធំ នៃសាលាខេត្តព្រៃវែង ដោយមានការអញ្ជើញចូលរួមពីសំណាក់ថ្នាក់ដឹកនាំ និងមន្ត្រីជំនាញជាច្រើនរូបរួមមាន ប្រធានសាលាដំបូងខេត្ត
តំណាងនាយកដ្ឋានអត្រានុកូលដ្ឋាន នាយកដ្ឋានស្ថិតិប្រជាពលរដ្ឋ និងនាយកដ្ឋានអត្តសញ្ញាណបណ្ណសញ្ជាតិខ្មែរ
នាយក នាយករងរដ្ឋបាលសាលាខេត្ត ស្នងការរង ប្រធានមន្ទីរ អង្គភាពពាក់ព័ន្ធ នាយក នាយករងទីចាត់ការសាលាខេត្ត
ប្រធានការិយាល័យស្ថិតិ និងអត្រានុកូលដ្ឋាន នាយការិយាល័យគ្រប់គ្រងការស្នាក់នៅ និងនាយការិយាល័យអត្តសញ្ញាណកម្ម
អភិបាលក្រុង ស្រុកទាំង១៣ និងអធិការនគរបាលក្រុង ស្រុក
ប្រធានការិយាល័យរដ្ឋបាល និងហិរញ្ញវត្ថុក្រុង ស្រុក
មេឃុំ ចៅសង្កាត់, នាយប៉ុស្តិ៍នគរបាលរដ្ឋបាលឃុំ សង្កាត់, ស្មៀនឃុំ សង្កាត់ និងជំនួយការរដ្ឋបាលឃុំ សង្កាត់ សរុបសមាសភាពចូលរួមទាំងអស់ចំនួន ៥៣០ រូប។
វគ្គបណ្ដុះបណ្ដាលនេះធ្វើឡើងក្នុងគោលបំណងពង្រឹងសមត្ថភាពយល់ដឹងបន្ថែមដល់មន្ត្រីអនុវត្តផ្ទាល់ នៅតាមមូលដ្ឋានក្រុង ស្រុក ឃុំ សង្កាត់ អំពីនីតិវិធីច្បាប់ និងលិខិតបទដ្ឋានគតិយុត្តថ្មីៗ ពាក់ព័ន្ធនឹងការងារអត្តសញ្ញាណកម្ម។ ជាងនេះទៅទៀត ក៏ដើម្បីជំរុញ និងតាមដានប្រសិទ្ធភាពនៃការផ្តល់ឯកសារអត្តសញ្ញាណជូនប្រជាពលរដ្ឋនៅក្នុងភូមិភាគ៦ ឱ្យកាន់តែមានភាពឆាប់រហ័ស តម្លាភាព និងត្រឹមត្រូវស្របតាមស្តង់ដារបច្ចេកទេស។
ក្រោយពិធីបើកជាផ្លូវការ វគ្គបណ្ដុះបណ្ដាលបានដំណើរការទៅតាមវារៈ ដោយមានការឧទ្ទេសនាមពីមន្ត្រីជំនាញនៃនាយកដ្ឋានពាក់ព័ន្ធ ដើម្បីឱ្យសិក្ខាកាមទាំងអស់យកទៅអនុវត្តនៅក្នុងដែនសមត្ថកិច្ចរបស់ខ្លួនឱ្យចំទិសដៅ និងទទួលបានលទ្ធផលខ្ពស់បំផុត៕
