ខេត្តព្រៃវែង: នារសៀលថ្ងៃអាទិត្យ ទី១០ ខែឧសភា ឆ្នាំ២០២៦ ក្រុមការងារលេខាធិការដ្ឋានសហភាពសហព័ន្ធយុវជនកម្ពុជា (ស.ស.យ.ក.) ខេត្តព្រៃវែង បានរៀបចំដំណើរសិក្សាស្វែងយល់ និងទស្សនកិច្ចកម្សាន្តនៅរមណីយដ្ឋានធម្មជាតិ “តំបន់ប្រើប្រាស់ច្រើនយ៉ាងទួលព័ន្ធតាឡី បឹងស្នេហ៍” ដែលស្ថិតក្នុងភូមិធាយ ឃុំធាយ ស្រុកបាភ្នំ ខេត្តព្រៃវែង។
ក្នុងឱកាសនៃការចុះសិក្សាស្វែងយល់នេះ ក្រុមការងារទទួលបានការចែករំលែកនូវព័ត៌មាន និងចំណេះដឹងយ៉ាងស៊ីជម្រៅពីសំណាក់មន្ត្រីជំនាញនៃមន្ទីរបរិស្ថានខេត្តព្រៃវែង និងមន្ត្រីសហគមន៍ អំពីសក្តានុពលដ៏សម្បូរបែបនៃតំបន់នេះ។
ប្រព័ន្ធអេកូឡូស៊ីដ៏មានតម្លៃ គឺការយល់ដឹងពីជីវចម្រុះ និងសារៈសំខាន់នៃតំបន់ដីសើមសម្រាប់បរិស្ថាន។
សក្តានុពលទេសចរណ៍ ភាពទាក់ទាញនៃតំបន់ប្រើប្រាស់ច្រើនយ៉ាង ដែលជាជម្រកសត្វស្លាប និងធនធានធម្មជាតិសម្រាប់វិស័យអេកូទេសចរណ៍។
ការគ្រប់គ្រង និងអភិរក្ស កិច្ចខិតខំប្រឹងប្រែងរបស់សហគមន៍ និងមន្ត្រីជំនាញក្នុងការថែរក្សាតំបន់នេះឱ្យនៅគង់វង្ស។
គោលបំណងចម្បងនៃដំណើរទស្សនកិច្ចនេះ គឺដើម្បីឱ្យយុវជន និងក្រុមការងារសហភាពសហព័ន្ធយុវជនកម្ពុជាខេត្ត យល់ដឹងកាន់តែច្បាស់ពីតម្លៃនៃតំបន់ធម្មជាតិក្នុងមូលដ្ឋានរបស់ខ្លួន។ លើសពីនេះ ក្រុមការងារក៏នឹងចូលរួមចំណែកយ៉ាងសកម្មក្នុងការផ្សព្វផ្សាយបន្តដល់៖
១. ភ្ញៀវទេសចរជាតិ និងអន្តរជាតិ ឱ្យស្គាល់កាន់តែច្បាស់ និងមកកម្សាន្តនៅតំបន់បឹងស្នេហ៍ឱ្យបានកាន់តែច្រើន។
២.បង្ហាញពីឱកាសក្នុងវិស័យអេកូទេសចរណ៍ សម្រាប់អ្នកដែលមានបំណងចង់វិនិយោគអភិវឌ្ឍតំបន់នេះឱ្យកាន់តែមានភាពទាក់ទាញ និងមានលក្ខណៈស្តង់ដារ។
សូមបញ្ជាក់ថា តំបន់ប្រើប្រាស់ច្រើនយ៉ាងទួលព័ន្ធតាឡី បឹងស្នេហ៍ គឺជាតំបន់អភិរក្សដ៏សំខាន់មួយក្នុងខេត្តព្រៃវែង ដែលមិនត្រឹមតែផ្ដល់ជាជម្រកដល់សត្វស្លាបរាប់ម៉ឺនក្បាលប៉ុណ្ណោះទេ ប៉ុន្តែថែមទាំងជាគោលដៅទេសចរណ៍បៃតងដ៏មានប្រជាប្រិយភាពសម្រាប់សាធារណជនទូទៅផងដែរ៕
