(កំពង់ចាម)៖ នាព្រឹកថ្ងៃទី២៧ ខែកញ្ញា ឆ្នាំ២០២៦ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញជាអធិបតីក្នុងពិធីលែងកូនត្រីចម្រុះប្រមាណ ២០ម៉ឺនកូន និងត្រីមេពូជជាច្រើនក្បាល ចូលទៅក្នុងប្រភពទឹកបឹងធម្មជាតិ នៅទីតាំងទំនប់ជ្រោយចេក ក្នុងឃុំស្រក ស្រុកកំពង់សៀម។ ព្រឹត្តិការណ៍នេះត្រូវបានរៀបចំឡើងដោយរដ្ឋបាលខេត្តកំពង់ចាម ដោយមានការឧបត្ថម្ភ និងគាំទ្រពីក្រុមហ៊ុន Ganzberg។
ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានបង្ហាញនូវក្តីរីករាយចំពោះការរៀបចំព្រឹត្តិការណ៍ដ៏សំខាន់នេះ ដែលជាការរួមចំណែកយ៉ាងសកម្មជាមួយរាជរដ្ឋាភិបាល ក្នុងការលើកកម្ពស់ការអភិរក្សធនធានជលផល និងការបង្កើនបរិមាណត្រីក្នុងប្រភពទឹកធម្មជាតិ។
ឯកឧត្តមអភិបាលខេត្តបានមានប្រសាសន៍សង្កត់ធ្ងន់ថា៖ «ការលែងកូនត្រី និងត្រីមេពូជនាពេលនេះ មិនត្រឹមតែជួយស្តារ និងបង្កើនស្តុកត្រីក្នុងប្រភពទឹកធម្មជាតិប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់ការធានាសន្តិសុខស្បៀង អាហារូបត្ថម្ភ និងការលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋានឱ្យកាន់តែប្រសើរឡើង។ កន្លងមក ក្រោយពីរាជរដ្ឋាភិបាលបានលុបបំបាត់ឡូត៍នេសាទ ខេត្តកំពង់ចាមសម្រេចបានការបង្កើតសហគមន៍នេសាទចំនួន ២០សហគមន៍ និងកន្លែងអភិរក្សមេពូជត្រីចំនួន ២៩កន្លែង។ ដូច្នេះ យើងត្រូវតែរួមគ្នាថែរក្សា និងអភិវឌ្ឍសមិទ្ធផលទាំងនេះឱ្យមានចីរភាព»។
ឯកឧត្តម អ៊ុន ចាន់ដា ក៏បានអំពាវនាវបន្ថែមឱ្យអាជ្ញាធរដែនដីគ្រប់លំដាប់ថ្នាក់ មន្ទីរ-អង្គភាពពាក់ព័ន្ធ និងប្រជាសហគមន៍ទាំងអស់ បន្តសហការគ្នាយ៉ាងជិតស្និទ្ធក្នុងការការពារតំបន់អភិរក្ស និងស្រះជម្រកត្រី។ ជាពិសេស ត្រូវបង្កើនកិច្ចខិតខំប្រឹងប្រែងក្នុងការទប់ស្កាត់ និងបង្ក្រាបបទល្មើសនេសាទខុសច្បាប់គ្រប់ប្រភេទ ដូចជា ការប្រើប្រាស់ឧបករណ៍ឆក់ ស្បៃមុង ឬសារធាតុពុល ព្រមទាំងទប់ស្កាត់ការកាប់ឆ្ការ និងការទន្ទ្រានកាន់កាប់ដីព្រៃលិចទឹក។ ការចូលរួមរបស់បងប្អូនទាំងអស់គ្នា គឺជាកត្តាកំណត់ជោគជ័យក្នុងការថែរក្សាធនធានជលផល ដើម្បីបង្កើនប្រាក់ចំណូល និងទុកជាសម្បត្តិមរតកដល់កូនចៅជំនាន់ក្រោយៗទៀត៕
