ខេត្តសៀមរាប: នាថ្ងៃទី២០ ខែមិថុនា ឆ្នាំ២០២៦ លោក ង៉ូវ សេងកាក់ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានចូលរួមក្នុងកម្មវិធី «ជជែកលើវិថីទេសចរណ៍រដូវកាលបៃតងឆ្នាំ២០២៦» ក្រោមប្រធានបទ៖ សក្តានុពលទេសចរណ៍ តំបន់បេតិកភណ្ឌ និងវប្បធម៌ក្នុងរដូវកាលបៃតង ដែលកម្មវិធីជជែកលើវិថីទេសចរណ៍ គឺជាកម្មវិធីកម្សាន្តមួយដែលផ្ដល់នូវអត្ថប្រយោជន៍ជាច្រើនក្នុងវិស័យ ទេសចរណ៍មានជាអាទិ៍ ការចែករំលែកនូវពុទ្ធិ និងបទពិសោធក្នុងការលើកកម្ពស់វិស័យទេសចរណ៍ ការផ្សព្វផ្សាយអំពីសក្តានុពលទេសចរណ៍កម្ពុជា ការបំផុស ស្មារតីសេ្នហាជាតិស្រឡាញ់ មាតុភូមិ ចូលរួមអភិរក្សសម្បត្តិ បេតិកភណ្ឌរូបិយ អរូបិយ សម្បត្តិធម្មជាតិ ស្របតាមទស្សទាន «ទេសចរណ៍ ផ្សារភ្ជាប់នឹងទឹកដី», «ស្រឡាញ់ជាតិ ត្រូវស្គាល់ទឹកដី», ជាពិសេស លើកកម្ពស់កិត្តិនាមកម្ពុជា និងចូលរួមបង្ហាញទៅកាន់ពិភពលោកថា កម្ពុជា ជាគោលដៅទេសចរណ៍សុវត្ថិភាព, ផ្ដល់នូវភាពកក់ក្ដៅ, បដិសណ្ឋារកិច្ចល្អ និងជាទឹកដីដ៏សែនមនោរម្យ ស្វាគមន៍ការមកកម្សាន្តរបស់ទេសចរមកពីគ្រប់ទិសទីទូទាំងសកលលោក។ កម្មវិធីដ៏សែនមនោរម្យនេះ មានការអញ្ជើញចូលរួមពីឯកឧត្តម ហួត ហាក់ រដ្ឋមន្រ្តីក្រសួងទេសចរណ៏ និងលោកជំទាវ ឯកឧត្តមរដ្ឋលេខាធិការប្រចាំការ, អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុនវឌ្ឍនៈ ប្រ៊ូវើរី, ឯកឧត្ដម លោកជំទាវ ថ្នាក់ដឹកនាំក្រសួងទេសចរណ៍, ឧកញ៉ា លោក លោកស្រីតំណាងក្រុមហ៊ុន R.V Clip Media, ដៃគូសហការឧបត្ថម្ភ, វាគ្មិនកិត្តិយស, លោក លោកស្រីមកពីវិស័យឯកជន, ភ្ញៀវកិត្តិយសជាតិ អន្តរជាតិយ៉ាងច្រើនកុះករ។
ឯកឧត្តមរដ្ឋមន្ត្រី បានគូសរំលេចថា ថ្មីៗនេះ កម្ពុជាបានបង្ហាញពីសមត្ថភាព និងកិត្យានុភាពរបស់ខ្លួនលើឆាកអន្តរជាតិ តាមរយៈការធ្វើជាម្ចាស់ផ្ទះរៀបចំ មហាសន្និបាតកាយឫទ្ធិនារីពិភពលោកលើកទី៣៩ និង កិច្ចប្រជុំប្រចាំឆ្នាំលើកទី៤២ របស់សហគមន៍ The Olave Baden-Powell Society (OB-PS) នៅខេត្តសៀមរាប ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តមរដ្ឋមន្ត្រី បានគូសរំលេចបន្ថែមថា ក្រោមការដឹកនាំ និងកិច្ចខិតខំប្រឹងប្រែងរបស់ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ព្រឹត្តិការណ៍ជាប្រវត្តិសាស្ត្រនេះ បានទាក់ទាញការចូលរួមពីប្រតិភូកាយឫទ្ធិនារីមកពីជាង ១០០ ប្រទេស និងតំណាងសមាគមសមាជិកចំនួន ១៥៣ ទូទាំងពិភពលោក។
ជាមួយគ្នានេះ ឯកឧត្តមរដ្ឋមន្ត្រី បានថ្លែងថា កម្មវិធីដ៏មានសារៈសំខាន់នេះ បានរៀបចំជាច្រើនដងរួចមកហើយ នៅទីតាំងផ្លូវថ្មើរជើងចតុមុខរាជធានីភ្នំពេញ ដោយទទួលបានការគាំទ្រ និងចូលរួមយ៉ាងច្រើនកុះករ ពីសំណាក់មហាជន និង ភ្ញៀវទេសចរអន្តរជាតិ។ បន្ថែមលើនេះ, អ្វីដែលជាតម្លៃបន្ថែមខ្ពស់ និង ពិសេសសម្រាប់កម្មវិធីជជែកលើវិថីទេសចរណ៍ នៅពេលនេះ គឺត្រូវបានសម្រិតសម្រាំងរៀបចំឡើងនៅក្នុងរដូវកាលបៃតង ឆ្នាំ២០២៦ ដោយចាប់ផ្តើមពីខេត្តសៀមរាប រួចបន្តដំណើរឆ្ពោះទៅខេត្តគោលដៅបន្តបន្ទាប់ ដែលជាខេត្ត Clusterនៅតំបន់ឆ្នេរ, តំបន់ភូមិភាគឥសាន្ត, បន្ទាប់មក នឹងបិទបញ្ចប់នៅ រាជធានីភ្នំពេញ ជាមួយនឹងប្រធានបទផ្សេងៗ ស្របទៅតាមសក្តានុពលនៃរាជធានី ខេត្តនីមួយៗ។
ក្នុងន័យនេះ ឯកឧត្តមរដ្ឋមន្ត្រី បានថ្លែងបន្តថា កម្មវិធីនេះ បានក្លាយជាកាតាលីករដ៏សំខាន់ក្នុងការជំរុញយុទ្ធនាការទស្សនាកម្ពុជានៅរដូវកាលបៃតង ដែល សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានឯកភាពគាំទ្រដាក់ចេញ ដើម្បីជំនួសឱ្យពាក្យ “រដូវកាលភ្ញៀវតិច” (ឬ Low Season) ចាប់ពីខែឧសភា ដល់ ខែតុលា, និងបានឯកភាព ផ្តល់សន្ទុះថ្មី ដល់ការបន្តអនុវត្តយុទ្ធនាការរដូវកាលបៃតងសម្រាប់ឆ្នាំ២០២៦នេះ ដែលទើបនឹងត្រូវបានប្រកាសជាផ្លូវការកាលពីថ្ងៃទី២ ខែឧសភា កន្លងទៅនេះ។
ទន្ទឹមនឹងនេះ ឯកឧត្តមរដ្ឋមន្ត្រី បានគូសបញ្ជាក់ថា ការបំប្លែងរដូវកាល «Green Season» មិនមែនគ្រាន់តែជាការផ្លាស់ប្តូរឈ្មោះនោះទេ ប៉ុន្តែគឺជាការផ្លាស់ប្តូរផ្នត់គំនិត និងជាយុទ្ធសាស្ត្រជាតិដ៏មុតស្រួច។ រដូវកាលនេះ គឺជាពេលវេលាដែលកម្ពុជាបង្ហាញនូវសម្រស់ដ៏ពិតប្រាកដនិងរស់រវើកបំផុតរបស់ខ្លួន។ ធម្មជាតិពោរពេញដោយភាពស្រស់បំព្រងពណ៌បៃតងខ្ចីគ្របដណ្តប់ពាសពេញប្រទេស ខ្យល់អាកាសបរិសុទ្ធ និងទេសភាពដ៏ត្រកាល បង្កើតបានជាបទពិសោធ ដ៏កម្រ និងមានតម្លៃសម្រាប់ភ្ញៀវទេសចរ។
