ខេត្តពោធិ៍សាត់: នារសៀលថ្ងៃទី២០ ខែមិថុនា ឆ្នាំ២០២៦ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យដោយផ្ទាល់ នូវសកម្មភាពដាំជួសកូនដើមក្ងោកបន្ថែម និងការកាត់តម្រឹមតុបតែងមែកដើមក្ងោកដែលកំពុងលូតលាស់ នៅតាមបណ្តោយដងផ្លូវ «អន្ទង់អាំង» នៃតំបន់ភ្នំ១៥០០។
សកម្មភាពនេះត្រូវបានធ្វើឡើងក្នុងគោលបំណងលើកកម្ពស់សោភ័ណភាព និងបន្ថែមភាពទាក់ទាញដល់ផ្លូវ «អន្ទង់អាំង» ដែលជាចំណុចទាក់ទាញទេសចរណ៍ដ៏សំខាន់ និងល្បីល្បាញមួយ ស្ថិតក្នុងភូមិសាស្ត្រភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។
ការកាត់តម្រឹម និងដាំបំពេញបន្ថែមនូវដើមក្ងោកទាំងនេះ មិនត្រឹមតែជួយរៀបចំសណ្តាប់ធ្នាប់រុក្ខជាតិតាមដងផ្លូវឱ្យមានរបៀបរៀបរយ និងសុវត្ថិភាពសម្រាប់អ្នកធ្វើដំណើរទស្សនូបការៈប៉ុណ្ណោះទេ ប៉ុន្តែវាក៏ជាផ្នែកមួយនៃការរួមគ្នាយ៉ាងសកម្ម ដើម្បីថែរក្សា និងបង្កើតភាពស្រស់បំព្រងនៃធម្មជាតិបៃតង ត្រៀមលក្ខណៈទទួលស្វាគមន៍ភ្ញៀវទេសចរជាតិ និងអន្តរជាតិ ដែលមកកម្សាន្តនៅតំបន់ភ្នំប្រវត្តិសាស្ត្រមួយនេះកាន់តែច្រើនឡើង។
ការយកចិត្តទុកដាក់ខ្ពស់ពីសំណាក់ថ្នាក់ដឹកនាំខេត្ត លើការងារតុបតែងលម្អធម្មជាតិនេះ បានស្តែងឱ្យឃើញពីការប្តេជ្ញាចិត្តក្នុងការប្រែក្លាយតំបន់ភ្នំ១៥០០ ឱ្យទៅជាគោលដៅទេសចរណ៍ធម្មជាតិដ៏បៃតង ស្រស់ស្អាត និងមាននិរន្តរភាពបំផុតរបស់ខេត្តពោធិ៍សាត់៕
