ខេត្តព្រៃវែង: នៅថ្ងៃទី១៦ ខែមិថុនា ឆ្នាំ២០Internal (២០២៦) នេះ នៅសាលាស្រុកស៊ីធរកណ្តាល សមាគមក្រុមប្រឹក្សាក្រុង ស្រុក ឃុំ សង្កាត់ ខេត្តព្រៃវែង បានរៀបចំកិច្ចវេទិកាមួយ ស្តីពី «អត្រានុកូលដ្ឋាន និងអត្តសញ្ញាណកម្ម» ក្នុងគោលបំណងពង្រឹងការយល់ដឹង និងប្រសិទ្ធភាពការងារលើវិស័យនេះនៅថ្នាក់មូលដ្ឋាន។
កិច្ចវេទិកាបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់៖
លោក ប៉ុក ឆុន ប្រធានសមាគមក្រុមប្រឹក្សាថ្នាក់មូលដ្ឋានខេត្តព្រៃវែង លោក យឹម យូគង់ ប្រធានក្រុមប្រឹក្សាស្រុកស៊ីធរកណ្តាល លោក ស៊ាន ចិន្តា អភិបាលនៃគណៈអភិបាលស្រុកស៊ីធរកណ្តាល។
ពិធីនេះក៏មានការអញ្ជើញចូលរួមពី លោក ឯក ចិន្តា អនុប្រធានអចិន្ត្រៃយ៍សមាគម ថ្នាក់ដឹកនាំសមាគម លោក សេង សុខាសេដ្ឋា វាគ្មិនតំណាងរដ្ឋបាលសាលាខេត្ត, លោក ហែន ពៅ និងលោក សុន រដ្ឋា វាគ្មិនតំណាងស្នងការដ្ឋាននគរបាលខេត្ត។ ព្រមទាំងមានការចូលរួមពី លោក-លោកស្រីសមាជិកក្រុមប្រឹក្សាស្រុក, អភិបាលរងស្រុក, មេបញ្ជាការកងកម្លាំងទាំងបីប្រភេទ, មេឃុំ, ក្រុមប្រឹក្សាឃុំ, និងលោកនាយប៉ុស្តិ៍នគរបាលរដ្ឋបាលឃុំ សរុបអ្នកចូលរួមទាំងអស់ប្រមាណ ១៥០នាក់។
វគ្គវេទិកានេះ ផ្តោតសំខាន់ទៅលើការផ្សព្វផ្សាយ និងពិភាក្សាលើការងារអត្រានុកូលដ្ឋាន និងអត្តសញ្ញាណកម្ម ដែលជាកិច្ចការងារដ៏សំខាន់ក្នុងការបម្រើសេវាសាធារណៈជូនប្រជាពលរដ្ឋឲ្យកាន់តែមានភាពងាយស្រួល ឆាប់រហ័ស និងមានតម្លាភាពស្របតាមគោលនយោបាយរបស់រាជរដ្ឋាភិបាល៕
