ខេត្តព្រៃវែង: នាព្រឹកថ្ងៃសុក្រ ទី៥ ខែមិថុនា ឆ្នាំ២០២៦ នេះ រដ្ឋបាលខេត្តព្រៃវែង បានរៀបចំបើកវគ្គបណ្ដុះបណ្ដាលរំលឹកឡើងវិញ ស្តីពី «ការគ្រប់គ្រងរដ្ឋបាលក្រុង ស្រុក តាមបែបវិមជ្ឈការ និងវិសហមជ្ឈការ»។ ពិធីនេះបានប្រព្រឹត្តទៅនៅសាលប្រជុំ (C) សាលាខេត្តព្រៃវែង ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អន ភារៈ អភិបាលរងនៃគណៈអភិបាលខេត្តព្រៃវែង។
យោងតាមរបាយការណ៍អ្នករៀបចំកម្មវិធី វគ្គបណ្ដុះបណ្ដាលដ៏មានសារៈសំខាន់នេះ មានការអញ្ជើញចូលរួមពីសំណាក់៖
លោក នាយករងរដ្ឋបាលសាលាខេត្ត លោក លោកស្រី សមាជិកក្រុមប្រឹក្សាក្រុង ស្រុក លោកនាយកទីចាត់ការ និងប្រធានអង្គភាពសាលាខេត្ត លោក លោកស្រី គ្រូឧទ្ទេស និងមន្ត្រីចំណុះទីចាត់ការ អង្គភាពសាលាខេត្ត លោក លោកស្រី អភិបាលរងក្រុង ស្រុក ទាំង១៣ លោក លោកស្រី នាយករដ្ឋបាលសាលាក្រុង ស្រុក និងមន្រ្តីពាក់ព័ន្ធសរុបចំនួន ១០៧ រូប។
វគ្គបណ្ដុះបណ្ដាលរំលឹកឡើងវិញនេះ ត្រូវបានរៀបចំឡើងក្នុងគោលបំណងពង្រឹងសមត្ថភាពបន្ថែមដល់មន្ត្រីរាជការ និងថ្នាក់ដឹកនាំរដ្ឋបាលថ្នាក់ក្រោមជាតិ ឱ្យកាន់តែមានការយល់ដឹងច្បាស់លាស់ ស៊ីជម្រៅ ទៅលើតួនាទី ភារកិច្ច និងការទទួលខុសត្រូវក្នុងការគ្រប់គ្រងរដ្ឋបាលក្រុង ស្រុក ស្របតាមគោលនយោបាយកែទម្រង់វិមជ្ឈការ និងវិសហមជ្ឈការ របស់រាជរដ្ឋាភិបាល ក៏ដូចជាដើម្បីលើកកម្ពស់ប្រសិទ្ធភាពនៃការផ្តល់សេវាសាធារណៈ និងការអភិវឌ្ឍក្នុងមូលដ្ឋានឱ្យកាន់តែល្អប្រសើរឡើងថែមទៀត៕
