ខេត្តព្រៃវែង: វិទ្យាល័យព្រៃដើមថ្នឹង មានមោទនភាពយ៉ាងក្រៃលែង សូមជម្រាបជូនដំណឹង និងគោរពអញ្ជើញសាធារណជន មាតាបិតា អ្នកអាណាព្យាបាលសិស្ស និងបងប្អូនប្រជាពលរដ្ឋទាំងអស់ ចូលរួមអបអរសាទរចំពោះសមិទ្ធផលដ៏ត្រចះត្រចង់ ដែលបុត្រា-បុត្រី និងសិស្សានុសិស្សនៃវិទ្យាល័យទទួលបានក្នុងការប្រឡង និងការប្រកួតកម្រិតខេត្ត និងកម្រិតជាតិ។
ដើម្បីជាការលើកទឹកចិត្ត និងបង្ហាញពីមោទនភាពចំពោះការខិតខំប្រឹងប្រែង វិទ្យាល័យនឹងរៀបចំ «ក្បួនដង្ហែអបអរសាទរយុវសិស្សពូកែ និងក្រុមជ័យលាភី» ដែលនឹងប្រព្រឹត្តទៅនៅថ្ងៃចន្ទ ទី៤ ខែឧសភា ឆ្នាំ២០២៦ វេលាម៉ោង៨:០០ នាទីព្រឹក តទៅ
ក្បួនដង្ហែនេះរៀបចំឡើងដើម្បីផ្ដល់កិត្តិយសជូនដល់ម្ចាស់ជ័យលាភី រួមមាន៖
១. យុវសិស្ស ថន រិនសុភៈ ម្ចាស់ជ័យលាភីលេខ១ ផ្នែកគណិតវិទ្យា ទូទាំងប្រទេស (ថ្នាក់ទី១២) ដែលជាកិត្តិយសដ៏ខ្ពង់ខ្ពស់សម្រាប់សាលា និងខេត្តព្រៃវែងទាំងមូល។
២. ក្រុមកីឡាបាល់ទាត់នារី ជ័យលាភីចំណាត់ថ្នាក់លេខ ១ ប្រចាំខេត្ត។
៣. ក្រុមកីឡាប៉េតង់៖
* ផ្នែកបុរស ទទួលបានចំណាត់ថ្នាក់លេខ ១ ប្រចាំខេត្ត។
* ផ្នែកនារី ទទួលបានចំណាត់ថ្នាក់លេខ ៣ ប្រចាំខេត្ត។
ជោគជ័យដ៏អស្ចារ្យនេះ មិនត្រឹមតែជាមោទនភាពរបស់វិទ្យាល័យព្រៃដើមថ្នឹងប៉ុណ្ណោះទេ ប៉ុន្តែថែមទាំងជាសក្ខីភាពបង្ហាញពីសមត្ថភាព និងការរីកចម្រើននៃវិស័យអប់រំ និងកីឡានៅក្នុងមូលដ្ឋានរបស់យើងផងដែរ។
អាស្រ័យហេតុនេះ សូមគោរពអញ្ជើញបងប្អូនប្រជាពលរដ្ឋ និងសិស្សានុសិស្សទាំងអស់ មេត្តាចូលរួមឱ្យបានកុះករ ដើម្បីញ៉ាំងឱ្យបរិយាកាសនៃក្បួនដង្ហែនេះកាន់តែមានភាពអធិកអធម និងជាកម្លាំងចិត្តដល់យុវជនជំនាន់ក្រោយក្នុងការខិតខំរៀនសូត្រ និងហាត់ពត់សមត្ថភាពបន្ថែមទៀត។
សូមចូលរួមអបអរសាទរទាំងអស់គ្នា!
