ខេត្តព្រៃវែង៖ ថ្ងៃទី១៤ ខែមេសា ឆ្នាំ២០២៦ បរិយាកាសនៅថ្ងៃទី១ នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល អដ្ឋស័ក ព.ស.២៥៧០ នៅក្នុងខេត្តព្រៃវែង បានចាប់ផ្ដើមឡើងយ៉ាងអធិកអធម និងមានភាពរស់រវើកបំផុត តាមរយៈការរៀបចំព្រឹត្តិការណ៍ «សង្ក្រាន្តព្រៃវែង» ដែលបានទាក់ទាញបងប្អូនប្រជាពលរដ្ឋយ៉ាងច្រើនកុះករមកចូលរួមយ៉ាងសស្រាក់សស្រាំ។
នៅក្នុងឱកាសដ៏វិសេសវិសាលនេះ គេសង្កេតឃើញមានការរៀបចំល្បែងប្រជាប្រិយខ្មែរចម្រុះបែប ដែលជាអត្តសញ្ញាណដ៏មានតម្លៃរបស់ជាតិ។ បងប្អូនប្រជាពលរដ្ឋ ទាំងក្មេង ចាស់ ប្រុស ស្រី បានចូលរួមលេងយ៉ាងសប្បាយរីករាយ ក្នុងនោះរួមមាន៖
ការទាញព្រ័ត បង្ហាញពីសាមគ្គីភាព និងកម្លាំងមាំមួន។ ការវាយក្អម បង្កើតបាននូវសម្លេងសើចកក្អាយ និងភាពរំភើបញាប់ញ័រ។ ការឡើងសសរខ្លាញ់ ដែលជាល្បែងដ៏ជក់ចិត្ត និងបង្ហាញពីការតស៊ូព្យាយាម។
ទោះបីជាស្ថិតក្រោមលក្ខខណ្ឌអាកាសធាតុមានកម្ដៅថ្ងៃបន្តិចក្ដី ក៏ទឹកមុខដែលពោរពេញដោយស្នាមញញឹម និងក្ដីសោមនស្សរីករាយរបស់មហាជន មិនមានការថយចុះឡើយ។ នេះគឺជាការស្ដែងឱ្យឃើញនូវស្មារតីសាមគ្គីភាព និងការរួមគ្នាលើកកម្ពស់ថែរក្សាប្រពៃណីវប្បធម៌ជាតិឱ្យកាន់តែរុងរឿង។
ស្របជាមួយគ្នានេះដែរ រដ្ឋបាលខេត្តព្រៃវែង ក៏បានសំណូមពរ និងក្រើនរំលឹកដល់បងប្អូនប្រជាពលរដ្ឋដែលមកកម្សាន្តទាំងអស់ សូមមេត្តា លេងកម្សាន្តដោយក្ដីថ្លៃថ្នូរ រក្សានូវសីលធម៌ និងសុវត្ថិភាពខ្ពស់។ ចូលរួមគោរពច្បាប់ចរាចរណ៍ បើកបរដោយការយោគយល់អធ្យាស្រ័យ ដើម្បីបង្ការគ្រោះថ្នាក់ផ្សេងៗ។ ចូលរួមទុកដាក់សម្រាមឱ្យបានត្រឹមត្រូវ ដើម្បីរក្សាសោភ័ណភាពទឹកដីខេត្តព្រៃវែង ឱ្យកាន់តែស្រស់ត្រកាលក្នុងឱកាសមហាសង្រ្កាន្តនេះ។
ព្រឹត្តិការណ៍ «សង្ក្រាន្តព្រៃវែង» នឹងបន្តរៀបចំរយៈពេល ២ថ្ងៃបន្ថែមទៀត ជាមួយនឹងកម្មវិធីកម្សាន្តសប្បាយៗជាច្រើនទៀត ជូនដល់បងប្អូនប្រជាពលរដ្ឋ និងភ្ញៀវទេសចរដែលមកកម្សាន្តក្នុងទឹកដីដ៏មានសក្ដានុពលមួយនេះ៕
