សៀមរាប: រដ្ឋបាលខេត្តសៀមរាប បានរៀបចំពិធីសូត្រមន្តកាន់បិណ្ឌទី ១១ នៃបុណ្យភ្ជុំបិណ្ឌ ដើម្បីឧទ្ទិសកុសល ផលបុណ្យ ជូនដល់បុព្វការីជន ទៅតាមទំនៀមទម្លាប់ព្រះពុទ្ធសាសនា នៅវត្តព្រះឥន្ទកោសីយ៍(ហៅវត្តលេី) នារសៀលថ្ងៃទី៦ ខែតុលា ឆ្នាំ ២០២៦ ក្រោមអធិបតីភាពឯកឧត្តម លី សំរិទ្ធ ប្រធានក្រុមប្រឹក្សាខេត្ត លោក អ៉ឹង គឹមលាង និងលោក ព្រឹម រដ្ឋា អភិបាលរងខេត្តតំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត ដោយមានការចូលរួមពីមន្ត្រីរាជការ និងជាមួយប្រជាពុទ្ធបរិស័ទទីជិតទីឆ្ងាយយ៉ាងច្រើនកុះករ ប្រកបដោយសទ្ធាជ្រះថ្លា បរិសុទ្ធក្នុងព្រះពុទ្ធសាសនា។
ក្នុងរដូវកាលនេះ ប្រជាពលរដ្ឋអ្នកកាន់ព្រះពុទ្ធសាសនាទីជិតទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្តាយនៅឯស្រុកកំណើត ដើម្បីរៀបចំម្ហូបអាហារ បាយសម្លរ ចង្ហាន់ យកទៅប្រគេនព្រះសង្ឃ ដែលគង់នៅតាមទីអារាមនានា និងបានឧទ្ទិសកុសលផលបុណ្យ ដែលបានកើតឡើង ពីកម្លាំងសទ្ធាជ្រះថ្លា ក្នុងឱកាសពិធីបុណ្យកាន់បិណ្ឌ និង ភ្ជុំបិណ្ឌ ជូនដល់បុព្វការីជន មានមាតា បិតា ជីដូនជីតា ញាតិការទាំង ៧ សន្តាន ដែលបានបាក់បែកចែកឋានទៅកាន់លោកខាងមុខហើយនោះ សូមបានទៅកាន់ឋានបរមសុខកុំបីឃ្លៀងឃ្លាតឡើយ៕
