🙏 សូមអនុមោទនាពិធីបុណ្យកាន់បិណ្ឌ​៧ នៃពិធីបុណ្យភ្ជុំបិណ្ឌ​ ប្រពៃណីជាតិរបស់ខ្មែរ​យេីង!

សៀមរាប: នាព្រឹកថ្ងៃទី៣ ខែតុលា​ ឆ្នាំ២០២៦​​ លោកជំទាវ​ សុិន​ ណម​ សមាជិកក្រុមប្រឹក្សាខេត្ត​ តំណាងឯកឧត្តម​ លី​ សំរិទ្ធ​ ប្រធានក្រុមប្រឹក្សាខេត្ត​ និងឯកឧត្តម​ ប្រាក់​ សោភ័ណ​ អភិបាល​ នៃគណៈអភិបាលខេត្ត ព្រមទាំងឯកឧត្តម លោកជំទាវ​ សមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព​ មន្ត្រីរាជការសាលាខេត្ត​ និងពុទ្ធបរិស័ទចំណុះជេីងវត្ត​ បាននាំយកទេយ្យទានមានគ្រឿងឧបភោគបរិភោគ និងបច្ច័យមួយចំនួន ដើម្បីវេរប្រគេនព្រះភិក្ខុសង្ឃគង់ចាំព្រះវស្សានៅ វត្តពុទ្ធស្ថាននគររាជធម្មមេត្តា​ (វត្តមេត្តាករុណា) ស្ថិតនៅភូមិកសិកម្ម សង្កាត់ស្រងែ ក្រុងសៀមរាប​ ដើមី្បឧទ្ទិសកុសលផលបុណ្យនេះ​ ថ្វាយចំពោះដួងវិញ្ញាណក្ខន្ធព្រះមហាវីរក្សត្រ បុព្វការីជន​ ជាពិសេសនោះគឺដួងវិញ្ញាណក្ខន្ធវីរកងទ័ពទាំងអស់​ ដែលបានពលីក្នុងសមរភូមិក្នុងការការពារទឹកដី និងសូមឧទ្ទិសកុសកផលបុណ្យនេះ ជូនដល់ញ្ញាតិការទាំងប្រាំពីរសន្តាន និងកម្មាភិបាល​ ដែលបានពលីជីវិត ក្នុងបុព្វហេតុរំដោះជាតិ ការពារកសាងអភិវឌ្ឍន៍ប្រទេស ដែលបានចែកឋានទៅកាន់លោកខាងមុខ ឲ្យបានរួចចាកផុត ពីឧបាយភូមិទាំងឡាយតាមរយៈព្រះសង្ឃជាស្រែបុណ្យ។

សូមអោយពុកម៉ែបងប្អូនទាំងអស់គ្នា ជួបតែសេចក្តីសុខ សេចក្តីចម្រើន ធ្វេីដំណេីរគ្រប់ទីកន្លែងសូមប្រកបដោយសុខសុវត្ថិភាព ក្នុងឱកាសនៃពិធីកាន់បិណ្ឌ និងបុណ្យភ្ជុំបិណ្ឌ។