ខេត្តព្រៃវែង៖ នៅថ្ងៃអង្គារទី៤ ខែសីហា ឆ្នាំ២០២៦ ក្រុមការងារបច្ចេកទេសវិស័យផ្គត់ផ្គង់ទឹក និងអនាម័យជនបទខេត្ត (PWGs) និងក្រុមការងារថ្នាក់ស្រុក (DWGs) ដោយមានកិច្ចសហការយ៉ាងជិតស្និទ្ធជាមួយរដ្ឋបាលឃុំល្វេ បានរួមគ្នារៀបចំយុទ្ធនាការ «បរិស្ថានស្អាត និងអនាម័យល្អ» នៅភូមិព្រែកចង្ក្រានលើ ឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង។
ពិធីនេះបានប្រព្រឹត្តទៅក្រោមអធិបតីភាព លោក ភី បូរ៉ា អភិបាលរងនៃគណៈអភិបាលស្រុកស៊ីធរកណ្ដាល ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំ និងមន្ត្រីជំនាញសំខាន់ៗ រួមមាន៖ លោក ម៉ៅ ឈុនហ៊ាង ប្រធានការិយាល័យថែទាំសុខភាពជនបទ លោកស្រី យ៉ុន ផល្លា ប្រធានការិយាល័យអភិវឌ្ឍន៍សហគមន៍ លោក ឆិល សុភាព មន្ត្រីការិយាល័យផ្គត់ផ្គង់ទឹកជនបទ លោក ហ៊ល ឡងឌី អនុប្រធានការិយាល័យថែទាំសុខភាពជនបទ។
កម្មវិធីនេះទទួលបានការចាប់អារម្មណ៍ និងចូលរួមយ៉ាងកុះករពីសំណាក់អាជ្ញាធរមូលដ្ឋាន និងប្រជាពលរដ្ឋក្នុងសហគមន៍ សរុបចំនួន ១៤៣ នាក់ (ស្រី ៨៨ នាក់)។
យុទ្ធនាការនេះរៀបចំឡើងក្នុងគោលដៅជម្រុញ និងលើកទឹកចិត្តប្រជាពលរដ្ឋឱ្យចូលរួមសម្អាតអនាម័យបរិស្ថាន ព្រមទាំងប្រតិបត្តិការប្រើប្រាស់ ការទុកដាក់ ការប្រើប្រាស់ឡើងវិញ និងការញែកសំរាមឱ្យបានត្រឹមត្រូវ និងមានសុវត្ថិភាព។ បន្ថែមពីនេះ យុទ្ធនាការក៏ផ្តោតលើគោលបំណងសំខាន់ៗមួយចំនួនទៀតដូចជា៖ កាត់បន្ថយហានិភ័យនៃការឆ្លងជំងឺផ្សេងៗដែលបណ្ដាលមកពីបរិស្ថានមិនស្អាត។ បង្កើតបរិយាកាសរស់នៅឱ្យមានភាពស្អាត ស្រស់បំព្រង និងមានសុវត្ថិភាព។ ការពារដី ទឹក និងខ្យល់ តាមរយៈការគ្រប់គ្រងសំណល់ និងទឹកសំណល់ឱ្យបានត្រឹមត្រូវ។ លើកកម្ពស់ការយល់ដឹង និងជម្រុញស្មារតីម្ចាស់ការរបស់ប្រជាពលរដ្ឋក្នុងការចូលរួមថែរក្សាអនាម័យ។បង្កើតបរិយាកាសរស់នៅដែលមានផាសុកភាព និងសុខដុមនីយកម្មក្នុងសហគមន៍។ រក្សាតុល្យភាពរវាងការអភិវឌ្ឍសេដ្ឋកិច្ច សង្គម និងការការពារបរិស្ថាន។
តាមរយៈយុទ្ធនាការនេះ អាជ្ញាធរ និងក្រុមការងារពាក់ព័ន្ធរំពឹងថានឹងផ្លាស់ប្តូរឥរិយាបថរបស់ប្រជាពលរដ្ឋឱ្យកាន់តែយកចិត្តទុកដាក់លើអនាម័យផ្ទាល់ខ្លួន និងបរិស្ថានជុំវិញខ្លួន ដើម្បីប្រែប្រួលភូមិឃុំឱ្យក្លាយជាកន្លែងរស់នៅប្រកបដោយសុខសុវត្ថិភាព និងផាសុកភាពវែងឆ្ងាយ។
