ខេត្តសៀមរាប: នាថ្ងៃទី១៩ ខែមីនា ឆ្នាំ២០២៦ នៅសាលប្រជុំធំសាលាខត្ត គណៈកម្មាធិការសម្របសម្រួលបច្ចេកទេស (គ.ស.ប)បានដំណេីរការកិច្ចប្រជុំក្រោមការដឹកនាំលោក សុខ ថុល អភិបាលរងខេត្ត និងជាអនុប្រធាន គ.ស.ប តំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត និងជាប្រធាន គ.ស.ប ដោយមានការចូលរួមពីឯកឧត្តម លោក លោកស្រី សមាជិក សមាជិកា គ.ស.ប ដេីម្បីពិនិត្យ ពិភាក្សាលេីរបៀបវារៈចំនួន៣ រួមមាន :
ក-ពិនិត្យ ពិភាក្សា និងអនុម័តលើសេចក្តីព្រាងប្រតិទិនកិច្ចប្រជុំគណៈកម្មាធិការសម្របសម្រួល បច្ចេកទេសរបស់ក្រុមប្រឹក្សាខេត្ត អាណត្តិទី៤ ឆ្នាំ២០២៦ ។
ខ- ពិនិត្យ ពិភាក្សា និងផ្តល់យោបល់លើបញ្ហាប្រឈមការស្នើសុំកែសម្រួលព្រំប្រទល់រដ្ឋបាល ក្រុង-ស្រុក ឃុំ សង្កាត់ ក្នុងខេត្តសៀមរាប និងបញ្ហាព្រំប្រទល់ជាមួយនឹងខេត្តព្រះវិហារ និងខេត្តកំពង់ធំ ។
គ- ពិនិត្យ ពិភាក្សា និងដោះស្រាយលើបញ្ជីសំណួរ-សំណូមពរ ដែលបានលើកឡើងក្នុងវេទិកា ផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត។
បន្ទាប់ពីអនុម័តលើរបៀបវារៈខាងលើរួច អង្គប្រជុំបានពិនិត្យ និងពិភាក្សាគ្នាយ៉ាងផុលផុសទៅលើរបៀបវារៈនីមួយៗ ទន្ទឹមនឹងនេះ លោក អភិបាលរងខេត្តបានណែនាំដល់ក្រុង ស្រុក មន្ទីរ អង្គភាពពាក់ព័ន្ធត្រូវពពន្លឿនការរៀបចំឯកសារ ដើម្បីក្រុមការងារបច្ចេកទេសកំណត់ព្រំប្រទល់ឱ្យបានលឿន។ ម្យ៉ាងទៀត ចំពោះបញ្ហាប្រជាពលរដ្ឋដែលបានលើកឡើងក្នុងវេទិការបស់ក្រុមប្រឹក្សាក្រុង ស្រុក មន្ទីរ អង្គភាពពាក់ព័ន្ធត្រូវបន្តដោះស្រាយ ហើយបញ្ហាណាដែលហួសដែនសមត្ថកិច្ចយើង ត្រូវរៀបចំដាក់ជូនក្រុមការងាររាជរដ្ឋាភិបាលពិនិត្យនិងដោះស្រាយជូនបងប្អូនប្រជាពលរដ្ឋយើង។
