ខេត្តព្រៃវែង: នៅថ្ងៃចន្ទ ទី២ ខែមីនា ឆ្នាំ២០២៦ លោក ស៊ាន ចិន្តា អភិបាលនៃគណៈអភិបាលស្រុកស៊ីធរកណ្តាល រួមជាមួយ លោក នួន ថូ ប្រធានគណៈកម្មាធិការគណបក្សស្រុក បានដឹកនាំក្រុមការងារចុះជួបសួរសុខទុក្ខដោយផ្ទាល់ដល់វីរកងទ័ពជួរមុខចំនួន ២រូប ដែលបានឆ្លៀតពេលសម្រាកត្រឡប់មកលេងស្រុកកំណើត។
អមដំណើរក្នុងសកម្មភាពមនុស្សធម៌នេះ រួមមានលោកអភិបាលរងស្រុក នាយករដ្ឋបាលសាលាស្រុល មេបញ្ជាការ-មេបញ្ជាការរង កងកម្លាំងទាំងបី ប្រធានការិយាល័យជំនាញ ព្រមទាំងអាជ្ញាធរមូលដ្ឋានភូមិ និងឃុំជាច្រើនរូបទៀត។
ក្នុងឱកាសនោះ លោកអភិបាលស្រុកបាននាំយកនូវប្រសាសន៍សួរសុខទុក្ខ និងអំណោយដ៏ថ្លៃថ្លារបស់ ឯកឧត្តមអភិសន្តិបណ្ឌិត ស សុខា ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តព្រៃវែង ជូនដល់វីរកងទ័ពទាំង ២រូប រួមមាន៖
១. លោក ម៉ិច សុផាត (អាយុ ២៨ឆ្នាំ) អង្គភាព កងពលតូចអន្តរាគមន៍លេខ១២៨ (ឈរជើងនៅទិសព្រះវិហារ)
មាន ទីលំនៅភូមិកោងទន្លេលើ ឃុំល្វេ អំណោយទទួលបានអង្ករ ៣០គីឡូក្រាម, មីខ្លាឃ្មុំ១កេស ត្រីខ១យួរ និងថវិកាចំនួន ៤០០,០០០រៀល។
២. លោក ស៊ឺ ដារ៉ូ (អាយុ ៣៣ឆ្នាំ) មកពីអង្គភាព កងពលលេខ១២៨ (ឈរជើងនៅទិសមុំបី) មានទីលំនៅភូមិព្រៃដើមថ្នឹងទី៣ ឃុំព្រៃដើមថ្នឹង អំណោយទទួលបាន អង្ករ ៣០គីឡូក្រាម មីខ្លាឃ្មុំ១កេស ត្រីខ១យួរ និងថវិកាចំនួន ៥០០,០០០រៀល។
លោក ស៊ាន ចិន្តា បានសម្តែងនូវការកោតសរសើរ និងដឹងគុណយ៉ាងជ្រាលជ្រៅចំពោះស្មារតីលះបង់របស់វីរកងទ័ព ដែលបានខិតខំបំពេញភារកិច្ចការពារបូរណភាពទឹកដីនៅតំបន់ជួរមុខ ដើម្បីសុខសន្តិភាព និងភាពសុខសាន្តរបស់ប្រជាជននៅទូទាំងប្រទេស។
សកម្មភាពនេះមិនត្រឹមតែជាការផ្តល់ជំនួយជាសម្ភារៈប៉ុណ្ណោះទេ ប៉ុន្តែគឺជាការបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំគ្រប់លំដាប់ថ្នាក់ ចំពោះសុខទុក្ខរបស់កងកម្លាំងប្រដាប់អាវុធ និងគ្រួសារកងទ័ព ដែលជាបង្អែកដ៏រឹងមាំនៃជាតិមាតុភូមិ៕
