អភិបាលខេត្តកំពង់ចាម នាំយកអំណោយដ៏ថ្លៃថ្លារបស់ សម្តេចធិបតី នាយករដ្ឋមន្ត្រី ចែកជូនប្រជាពលរដ្ឋរងផលប៉ះពាល់ដោយគ្រោះរាំងស្ងួតចំនួន ៧១គ្រួសារ នៅឃុំតាប្រុក ស្រុកចំការលើ

(កំពង់ចាម)៖ នាព្រឹកថ្ងៃទី១១ ខែវិច្ឆិកា ឆ្នាំ២០២៦ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តកំពង់ចាម បាននាំយកអំណោយមនុស្សធម៌ដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចែកជូនប្រជាពលរដ្ឋចំនួន ៧១គ្រួសារ ដែលទទួលរងផលប៉ះពាល់លើដំណាំស្រូវដោយសារគ្រោះរាំងស្ងួត ស្ថិតនៅនាងលើង ឃុំតាប្រុក ស្រុកចំការលើ ខេត្តកំពង់ចាម។

ក្នុងឱកាសនោះ ឯកឧត្តម អ៊ុន ចាន់ដា បានពាំនាំនូវប្រសាសន៍ផ្តាំផ្ញើសួរសុខទុក្ខ និងសេចក្តីនឹករលឹកយ៉ាងជ្រាលជ្រៅពីសំណាក់ សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនចំពោះប្រជាពលរដ្ឋទាំងអស់។ ជានិច្ចកាល សម្តេចធិបតី និងលោកជំទាវ តែងតែយកចិត្តទុកដាក់ និងគិតគូរខ្ពស់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋនៅគ្រប់ទិសទី ដោយមិនទុកឱ្យប្រជាពលរដ្ឋណាម្នាក់រងគ្រោះដោយអត់ឃ្លាន ដោយគ្មានការដឹងឮ ឬមិនទទួលបានការយកចិត្តទុកដាក់នោះឡើយ។

ជាមួយគ្នានេះ ឯកឧត្តមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យចូលរួមថែរក្សាសុខភាព ដោយប្រកាន់ខ្ជាប់នូវអនាម័យតាមគោលការណ៍ «រស់នៅស្អាត ហូបស្អាត និងផឹកស្អាត» ដើម្បីបង្ការជំងឺផ្សេងៗ ដែលអាចប៉ះពាល់ដល់ថវិកា និងសេដ្ឋកិច្ចគ្រួសារ។ ឯកឧត្តមបានបញ្ជាក់បន្ថែមថា ប្រសិនបើមានបញ្ហាសុខភាព ឬសង្ស័យថាមានរោគសញ្ញាជំងឺគ្រុនឈាម ឬជំងឺផ្សេងៗ សូមកុំធ្វេសប្រហែស ឬព្យាបាលដោយខ្លួនឯង ត្រូវប្រញាប់ទៅកាន់មន្ទីរពេទ្យ ឬមណ្ឌលសុខភាពដែលនៅជិតបំផុត ដើម្បីទទួលបានការពិនិត្យ និងព្យាបាលទាន់ពេលវេលា។

ចំពោះអំណោយដែលបានចែកជូនដល់ប្រជាពលរដ្ឋរងផលប៉ះពាល់ទាំង ៧១គ្រួសារ ក្នុងមួយគ្រួសារទទួលបាន៖ អង្ករ ២៥គីឡូក្រាម មី ១កេស ទឹកបរិសុទ្ធ ១កេស ទឹកស៊ីអ៊ីវ ១យួរ ទឹកត្រី ១យួរ ត្រីខ ១យួរ ព្រមទាំងថវិកាឧបត្ថម្ភមួយចំនួនផងដែរ៕

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *