ខេត្តព្រៃវែង៖ នៅថ្ងៃទី២០ ខែ តុលា ឆ្នាំ២០២៦ ឯកឧត្តម សួន សុម៉ាលីន ប្រធានគណៈកម្មាធិការសាខាខេត្ត បានដឹកនាំគណៈកម្មាធិការសាខាខេត្ត ប្រតិភូអមដំណើរ មន្ទីរ អង្គភាព ក្រុមប្រតិបត្តិសាខា លោក ចន វៃ ប្រធានគណៈកម្មាធិការអនុសាខាក្រុងព្រៃវែង ក្រុមកាកបាទក្រហមឃុំ អ្នកស្ម័គ្រចិត្ត ទីប្រឹក្សា និងយុវជនកាកបាទក្រហមកម្ពុជា ចុះប្រគល់ផ្ទះ ៣ខ្នងផ្ទះ ទំហំ ៤មx៦ម ធ្វើអំពីឈើ ដំបូលប្រក់ក្បឿងជ័រ ជញ្ជាំងជ័រ និងបង្គន់អនាម័យ ចំនួន ៣ ក្នុងផែនការឆ្នាំ២០២៦ ជាអំណោយរបស់សាខាខេត្ត ផ្តល់ជូនដល់គ្រួសារក្រីក្រ ១គ្រួសារ និងគ្រួសាររងហានិភ័យ ២គ្រួសារ នៅសង្កាត់បារាយណ៍ តាកោ និងសង្កាត់ជើងទឹក ក្នុងក្រុងព្រៃវែង ខេត្តព្រៃវែង។
ក្នុងឱកាសនោះ ក្រុមប្រតិបត្តិសាខា អនុសាខាស្រុក អ្នកស្ម័គ្រចិត្តភូមិ និងយុវជនកាកបាទក្រហមកម្ពុជា បានបញ្រ្ជាបការអប់រំផ្សព្វផ្សាយវិជ្ជាសង្គ្រោះបឋម អនាម័យទឹកស្អាតក្នុងគ្រាអាសន្ន ការត្រៀមបង្ការ និងទប់ស្កាត់ការរាតត្បាតនៃជំងឺកូវីដ-១៩ វិធានការបង្ការការឆ្លងរាលដាលនៃជំងឺគ្រុនឈាម-គ្រុនឈីក សុវត្ថិភាពចរាចរណ៍ ការប្រែប្រួលអាកាសធាតុ និងបរិស្ថាន គោលការណ៍គ្រឹះចលនាកាកបាទក្រហម និងអឌ្ឍចន្ទក្រហម និងការធ្វើចំណាកស្រុកប្រកបដោយសុវត្ថិភាព សរុបអ្នកចូលរួមចំនួន ១៣២នាក់ ស្រី ៨៧នាក់។
ក្រៅពីការប្រគល់ផ្ទះ សម្ភារៈផ្តល់ជូនបន្ថែមរួមមាន៖
-សាខាខេត្ត៖ អង្ករ ២៥គ.ក ឃីត ១កញ្ចប់(មុង ភួយ សារុង ក្រមា) មី ១កេស ត្រី ខ ១យួរ និងថវិកាក្នុង ១គ្រួសារ ចំនួន ១០០,០០០រៀល។
-សាខាខេត្ត បានឧបត្ថម្ភកង់ ជូនដល់កូនៗ របស់គ្រួសារទទួលផលផ្ទះ នៅសង្កាត់តាកោ ១គ្រឿង និងសង្កាត់ជើងទឹក ១គ្រឿង សម្រាប់ធ្វើដំណើរទៅមកសាលារៀន។
-ឯកឧត្តម សួន សុម៉ាលីន ប្រធានគណៈកម្មាធិការសាខាខេត្ត បានដោះស្រាយនូវសំនូមពររបស់គ្រួសារទទួលផលផ្ទះ រួមមាន៖ តបណ្តាញអគ្គីសនី ផ្តល់អណ្តូងទឹក ១(ប្រគល់ជូនមន្ទីរអភិវឌ្ឍន៍ជនបទ សម្របសម្រួល) ដល់គ្រួសារ នៅសង្កាត់បារាយណ៍ ឧបត្ថម្ភកង់ ១គ្រឿង បន្ថែម ដល់គ្រួសារ នៅសង្កាត់តាកោ និងផ្តល់ជូនម៉ូតូ ២គ្រឿង(ដល់គ្រួសារនៅសង្កាត់បារាយណ៍ ១គ្រឿង និងសង្កាត់ជើងទឹក ១គ្រឿង) និងបានឧបត្ថម្ភជាឧបករណ៍ជួយគាំទ្ររាងកាយ(កូនគ្រួសាររងហានិភ័យ នៅសង្កាត់ជើងទឹក ដែលមន្ទីរសង្គមកិច្ច ជួយសម្របសម្រួល)។
-សម្ភារៈអនុសាខាក្រុងព្រៃវែង ផ្តល់ជូនបន្ថែមរួមមាន ៖ អង្គរ ២៥គ.ក មី ១កេស និងថវិកាចំនួន ១០០,០០០រៀល។
សាខាខេត្ត ក៍បានឧបត្ថម្ភថវិកាដល់លោកយាយ លោកតា ចូលរួមក្នុងកម្មវិធីផងដែរ។
គណៈកម្មាធិការសាខាខេត្ត និងក្រុមការងារអនុសាខាស្រុក បានដាំដើមឈើ ទុកជាអនុស្សាវរីយ៍ នៅបរិវេណផ្ទះគ្រួសារទទួលផល សរុបចំនួន ៦ដើម(ដើមស្វាយ ៥ដើម និងដើមខ្នុរ ១ដើម)។
បញ្ជាក់៖ គិតត្រឹមថ្ងៃទី២០ ខែ តុលា ឆ្នាំ២០២៦ សាខាខេត្ត បានប្រគល់ផ្ទះសរុបចំនួន ២៨៩ខ្នងផ្ទះ និងបង្គន់អនាម័យសរុបចំនួន ២៣៩បង្គន់។
