(សាធារណរដ្ឋប្រជាមានិតចិន)៖ នៅព្រឹកថ្ងៃទី៤ ខែវិច្ឆិកា ឆ្នាំ២០២៦ គណៈប្រតិភូរដ្ឋបាលខេត្តកំពង់ចាម ដឹកនាំដោយឯកឧត្តម អ៊ុន ចាន់ដា អភិបាលនៃគណៈអភិបាលខេត្ត អញ្ជើញបន្តដំណើរទស្សនកិច្ចទៅកាន់វិទ្យាស្ថានស្រាវជ្រាវ និងអភិវឌ្ឍន៍ដំណាំដូង CATAS ក្នុងខេត្តហៃណាន ដោយបានជួបពិភាក្សាការងារជាមួយលោក ជូ អានហុង លេខាធិការនៃគណៈកម្មាធិការបក្ស ទទួលបន្ទុកវិទ្យាស្ថានស្រាវជ្រាវដំណាំដូង CRI។
ក្នុងជំនួបនេះ ភាគីទាំងពីរបានពិភាក្សា និងផ្លាស់ប្តូរយោបល់គ្នា ដើម្បីស្វែងរកលទ្ធភាពពង្រឹង និងពង្រីកកិច្ចសហប្រតិបត្តិការរវាងវិស័យកសិកម្មខេត្តកំពង់ចាម និងខេត្តហៃណាន ឱ្យកាន់តែមានភាពរឹងមាំ ច្បាស់លាស់ និងស៊ីជម្រៅបន្ថែមទៀត។ ជាពិសេស ការផ្លាស់ប្តូរចំណេះដឹង បទពិសោធន៍ និងជំនាញបច្ចេកទេស ការលើកកម្ពស់ធនធានមនុស្ស កិច្ចសហការស្រាវជ្រាវលើដំណាំកសិកម្ម ការផ្តល់អាហារូបករណ៍ និងការបណ្តុះបណ្តាលពង្រឹងសមត្ថភាពដល់មន្ត្រីជំនាញ និងនិស្សិតក្នុងវិស័យកសិកម្ម ព្រមទាំងការជំរុញកិច្ចសហប្រតិបត្តិការរវាងមន្ទីរនិងមន្ទីរ វិទ្យាស្ថាននិងវិទ្យាស្ថាន និងការវិនិយោគរួមគ្នាលើវិស័យកសិកម្មឱ្យកាន់តែទូលំទូលាយ។
ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានគូសបញ្ជាក់អំពីសក្តានុពល និងឱកាសវិនិយោគនៅក្នុងខេត្តកំពង់ចាម ជាពិសេសលើវិស័យកសិកម្ម ដោយខេត្តមានកត្តាអំណោយផលជាច្រើន រួមមាន កម្លាំងពលកម្មគ្រប់គ្រាន់ ផ្ទៃដីកសិកម្មធំទូលាយ និងមានជីជាតិ ព្រមទាំងហេដ្ឋារចនាសម្ព័ន្ធដឹកជញ្ជូនកសិផល និងផលិតផលផ្សេងៗកាន់តែមានភាពងាយស្រួល។ ជាមួយគ្នានេះ ខេត្តកំពង់ចាមក៏មានសក្តានុពលក្នុងការតភ្ជាប់ប្រព័ន្ធដឹកជញ្ជូនតាមរយៈកំពង់ផែ និងគម្រោងព្រែកជីកហ្វូណនតេជោ ដែលជាកត្តាគាំទ្រដល់ការដឹកជញ្ជូន និងការពង្រីកទីផ្សារផលិតផលកសិកម្មផងដែរ។
គួរបញ្ជាក់ថា ដំណើរទស្សនកិច្ចផ្លូវការនេះ គឺជាថ្ងៃទី៣ របស់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ក្នុងគោលបំណងពង្រឹងចំណងមិត្តភាព និងកិច្ចសហប្រតិបត្តិការអន្តរជាតិ រវាងខេត្តសម្ព័ន្ធមេត្រីភាពកំពង់ចាម នៃព្រះរាជាណាចក្រកម្ពុជា និងខេត្តហៃណាន នៃសាធារណរដ្ឋប្រជាមានិតចិន៕

